සුන්දරම මතකය

අයිසෙ බලනවා..මගෙ මේ අත කෙලින් බලනවා..මොකද්ද පේන්නෙ!.. මන්දිරය..මොන මන්දිරයද..විලියම්ස් මන්දිරය...බාගෙට ගරා වැටිච්ච විලියම්ස් මන්දිරය...තමුසෙට කියන්න මට නියම කතාවක් තියෙනව...අහගන්නවකො.. මේක සිද්ධවුනේ ඔය මන්දිරේ මුලයිතිකාරය ටෙඩ් විලියම්ස්ගෙ කාලෙ..මට එතකොට අවුරුදු දහයක් දොළහක් ඇති.. මතකනෙ ටෙඩ් විලියම්ස් ?..ලෝකප්‍රකට බේස්බෝල් කාරය..ඔය ඉතින් තියෙන්නෙ එයාගෙ මන්දිරය...

අපිට ටෙඩ් විලියම්ස්ව මතකනෑ.. හැබැයි එයාගෙ පුතා ඔය දැන් බංකොලොත් වෙලා ඉන්න විලියම්ස් ජුනියර්ව නම් දන්නව..අපිට ඔහේතරම් වයස නෑ නෙ..

ඇත්තනෙ. තමුසෙල ඔක්කොම පස්සෙනෙ  මේ පලාතට ආවෙ..

ඉතින් කියනවකෝ..මොකද්ද ටෙඩ් විල්ලියම්ස් ගෙ කාලෙ උනෙ..

තමුසෙල පිළිගන්නවද එයා මං එක්ක බේස්බෝල් ගැහුව කියල...?

පුහ්..ඒක නම් කෙප්පයක්..තමුසෙයි මායි ගහපු බේස් බෝල්..අනික මං දන්න විදිහට ඔය විලියම්ස් ලා හෙන උද්දච්ඡ මිනිස්සු. උඩඟුයි. මේඅපි වගේ මිනිස්සු එක්ක බේස්බෝල් ගහනව තියා කතාකරන්නෙ වත් නෑ. ඉතින් තමුසෙ කියනව බේස් බෝල් ගැහුවලු!. කොහොමද පිළිගන්නෙ..කමක් නෑ කතාව කියනවකො..මංඅහගෙනඉන්නම්.

ඒක වුනේ මෙහෙමයි. මං පුංචිකාලෙදි පුදුම ආසාවකින් උන්නෙ ඔය විලියම්ස් මන්දිරේ ඇතුලට යන්න. අඩුම ගානෙ අර මහ විශාල වත්ත අස්සට වත්. ඒත් වටේම වැටවල් තාප්ප..මං වෙලාවක් එනකල් බලන් උන්නෙ. ඉතින් විශ්වාස කරනවකො! දවසක් මගෙ වාසනාව පෑදුන..තමුසෙ අහගෙනද ඉන්නෙ? මං දැක්ක දවසක් ඔය විලියම්ස් මන්දිරේ වැටේ එක තැනක ලීයක් කැඩිලතියෙනව. මම ගිහින් මුරකාරයට කිව්ව...වැටේ ලීයක් කැඩිල මං කැමතියි නොමිලේම ඒක හදල දෙන්න කියල. මුරකාරය මාව පන්න ගන්න හැදුවෙ!. බලනවකො අයිසෙ වෙලාව කියන්නෙ එතකොටම එතන්ට ආවනෙ ටෙඩ්..ඔව්..ටෙඩ් විලියම්ස් එතනට ආව. මේ තමුසෙ අහගෙන නේද ඉන්නෙ ?

ඔව් ඔව් ඉතින් කියනවකො!.

විලියම්ස් මගෙන් ඇහුව ඇත්තටම නොමිලේමද හදන්නෙ..ඒ වැඩ ඔය ළමයට පුලුවන්ද කියල..මට අදහගන්නත් බෑ අයිසෙ..ටෙඩ් විලියම්ස් මා එක්ක කතා කලා..

ඉතින් ඉතින්..

මං ගත්කටටම  පුලුවන් ..මගෙ සීය හොඳින් මට ඒ වැඩ උගන්නල තියෙන්නෙ කිව්ව.. මෙන්න අයිසෙ ටෙඩ් විලියම්ස් මට ගේට්ටුව ඇරල වත්ත ඇතුළට එන්න කිව්ව..

අදහන්න බෑ අයිසෙ..ඔය ටෙඩ් විලියම්ස් කවදාවත් මේ ගමේ මිනිහෙක් එක්ක කතා බස් කලා කියල මංහිතන්නෑ. තමුසෙ ඇත්තමද ඔය කියන්නෙ?

ඇත්ත තමයි අයිසෙ...මං ගිහින් වැටේ ලීය බොහොම හොඳට හදල දුන්න. වැඩේඉවර වෙනකොට ටෙඩ් විලියම්ස් එතන. මගෙන් ඇහුව මොනාද ඕනෙ කියල! මංකිව්ව..ඔයා බේස් බෝලෙකට ගහනව බලන්න ආසයි කියල...ආ..අහනවකො..එතන එයාගෙ ලස්සන නෝනත් හිටිය...මගෙත් එක්ක හිනා උනහැටි මට අද වගේ මතකයි..

කෙප්ප,,මේ නම් අමූලික කෙප්ප..ඔය කියන ගෑනිත් හෙන ආඩම්බරකාර ගෑණියෙක්..එහෙමයි මං අහල තියෙන්නෙ!

නෑ අයිසෙ..තමුසෙ පිළිගන්නවකො..ටෙඩ් විලියම්ස් බේස්බෝල් පිත්තයි බෝලෙයි අරං ආව..මට කිව්ව පුලුවන් විදිහකට බෝලෙ දාන්න කියල. මාත් ඉතින් දන්න විදිහට බෝලෙ විසි කලා මිනිහගෙ දිහාට..ටෙඩ් විලියම්ස් දුන්නනෙ මරු පාරක්..කියල වැඩක් නෑ අයිසෙ..මට අදවගේ මතකයි..අම්මෝ බෝලෙ ගිය දුර..පුදුම ලස්සන බලගතු පහරක් අයිසෙ ඒක.. තමුසෙ හිතා ගන්නවකො ඉතින්.. විලියම්ස් නෝන අත්පුඩි ගැහුව මට අද වගේ මතකයි..

දැන් එතකොට තමුසෙ ටෙඩ් විලියම්ස් එක්ක බේස්බෝල් ගැහුව! විලියම්ස් ගෑණි එතන බලාගෙන හිටිය. ආ තව අප්පුඩිත් ගැහුව..මරු කතාව අයිසෙ..මරේ මරු..

ඔව්. තමුසෙට මාව විශ්වාස නෑ..කමක් නෑ අයිසෙ. ඒ සිද්ධිය මම මතක් නොකරපු දවසක් නෑ..ඕ මේජීවිත කාලෙම. ඒක පුදුම අත්දැකීමක් අයිසෙ. පුදුම මතකයක්. මං හිතන්නෑ මැරුනත් මට ඒක අමතක වෙයි කියල. ලෝකප්‍රකට ශ්‍රේෂ්ඨ ටෙඩ් විලියම්ස් මගෙත් එක්ක..මේ පොඩි වඩු බාස් කොල්ලත් එක්ක බේස්බෝල් ගැහුව..ඔව්.ඉතින් ඒ තමයි මගෙ සුන්දරම මතකය.  තමුසෙට ඉතින් විහිළු !.

බලනව. විලියම්ස් මන්දිරය ගරා වැටිල. හරියට මේ මං වගේ..ඒත් ඒත්..අර මතකය..ඒක තාමත් ඒවගේමයි  අයිසෙ.මං අදත් ඔනැම වෙලාවක ඒ මතකය ඇදල ගන්නව. 

ටෙඩ් විලියම්ස් මගෙත් එක්ක බේස්බෝල් ගැහුව අයිසෙ. තමුසෙල පිළිගත්තත් නැතත්.

චිත්‍රපට ප්‍රේක්ෂකයන් වර්ග ....

චිත්‍රපට නැරඹීම ලොකු කුඩා බොහෝ දෙනෙකුගේ විනෝදාංශයක් බව අවිවාදිතය. මේ කියන්නට යන්නේ චිත්‍රපට නරඹන ප්‍රේක්ෂකයන් වර්ග ගණනාවක් ගැනය.

විචාරකයෝ..

මොවුන්ට කිසිම චිත්‍රපටයක් හොඳ නැත. බලන්නට ගත්ත වෙලේ සිට එහි අඩුපාඩු පෙන්වති. කැමරාකරණයේ අඩුපාඩු, පසුතල වල නළු නිළියන්ගේ මේකප්වල ඇඳුම් ආයිත්තම් වල අඩුපාඩු සියල්ලම පෙනෙයි. මේ චිත්‍රපටය මීට වඩා හොඳින් කල හැකි ආකාරය ගැන ගෙදර සිට උපදෙස් දෙති.

බඩජහරියෝ..

මොවුන්ට මොනවා හෝ කන්නට නැතිව චිත්‍රපට බැලීමට නොහැක. චිත්‍රපටය පටන් ගත්ත තැන සිට හපන්නට යමක් අවශ්‍යය. චිත්‍රපටය අතරමග තාවකාලිකව නවතා (pause )කන්නට යමක ගෙන එන්නට යති. ඔවුහු එනතෙක් අන් අයට චිත්‍රපටය බැලීම තහනම්ය. මහ රෑ වුව පාරට ගොස් වඩේ, එලවලු රොටි ආදිය රැගෙන එති.

නළුවාගේ/නිළියගේ යහළුවෝ සහ නෑයෝ..
චිත්‍රපටය ආරම්භ වේ." අම්ම..විජේ අය්ය...! කාලෙකට පස්සෙ..".. ආ ධර්මෙ මල්ලිද ඉන්නෙ? ඕකගෙ මගුල්ගෙදරත් ගියානෙ අපි".."ආනේ කාන්ති නංගි ඉන්න ෆිල්ම් එකද? අපෝ ඒ කාලෙ කෙට්ටු ඕකිගෙ!" යනාදී වශයෙන් ආරම්භ වන නෑකම් විස්තරය මහ කරච්චලයක් වගේම චිත්‍රපටය බලන අන් අයට මහා වධයක් වෙයි. එක්කෝ නළුවා, නිළිය තමන් ගේ යාළුවෙකි. "ආ වික්ක..අම්මෝ ඕකගෙ කලු ඒ කාලෙ! මගෙ පංතියෙනෙ.! " “මේ මෙන්න සුභා ඉන්න ෆිල්ම් එක! ඔයාට මතකද මගෙ ක්ලාස්මේට්. මගෙ එහා පැත්තෙ ඉඳගෙන හිටියෙ. අපෝ ඕකිගෙ හෙන නැටිල්ල ඒ කාලෙත්!". අය්යෝ ඉතින් චිත්‍රපටය බලන අස්සේ මේ විස්තරයද අසන්නට සිදු වෙයි.

විශේෂඥයෝ

මොවුන්ගේ විශේෂඥ දැනුම පුදුම එළවන සුළුය. යුධ චිත්‍රපටයක් නරඹනවා යැයි සිතමු. "ඔය වෙපන් එක තමයි ඒ කාලෙ හොඳම එක". ඔය ටෑන්ක් එකට ගහන්න බෑ මොකාටවත්". ඔය තමයි ෆාස්ටස්ට් ම ප්ලේන් එක. " දන්නවද ඒ වයර් එක එහෙම කැපුවෙ ඇයි කියල?නැත්තම් පුපුරනවා". ඔය ගන් එකේ එකපාරට හතරයි බුලට්ස් දාන්න පුලුවන්". හය්යෝ හෙනබොරු. ඔය කාර් එකට ඔච්චර ස්පීඩ් එකෙන් යන්න බෑ. ගිහින් ඔහොම වංගුගන්න බෑ. ඔය කාලෙ ඔහොම කඩු තිබ්බෙ නෑ. අනේ ඔච්චර උඩ ඉඳන් මිනිහෙක්ට පනින්න පුලුවන්ද?"  මෙයාදී වශයෙන් ඔවුන්ගේ විශේෂඥ දැනුම චිත්‍රපට බලනතාක් අන් අයට නොමිලේ බෙදා දෙනු ඇත..

ඕපේ..

 නළු නිළියන්ගේ සියලු ඕපදූප මොවුහු දනිති. "ඔය නළුවනෙ අර ගැනිත් එක්ක යාළු වෙලා ඉන්නෙ!. මෙයා ඉන්නෙ ගම්පහ. ඔයාගෙ තාත්ත හෙන බිස්නස්මන්. ඔය මිනිහනෙ අර කුඩු කේස් එකට අහු උනේ".  ඕකිට ළමයි හතරක් ඉන්නව. තව එකෙක් ලැබෙන්න ඉන්නව. මගෙ යාළුවෙක් ඉන්නව මෙයාගෙ ගෙවල් ළඟ. අපෝ මෙයාගෙ හෙන ඔළුව ලු ". නළු නිළියන්ගේ අහළපහළ උදවිය ගැනද මොවුහු ඇතැඹුලක් සේ දනිති.

සංවේදී මිනිස්සු..

හැඟීම්බර දර්ශන නැරඹීම මොවුන්ට ඉතා අසීරුය. දෑසින් කඳුලු ගලයි. ඉකිබිඳිති. මුහුණු දික්වෙයි.තත්වය දරුණු වුනොත් කෑම බීම පවා එපා වෙයි. දුෂ්ඨයාට කුණුහරුපෙනුත් බනිති. "අනේ අර බලපං.. පව් බං.! ,මුගෙ අම්මට..ඇයි බං එහෙම කරන්නෙ මිනිස්සුන්ට ." මෙයාදී වශයෙන් සංවේදී වන මොවුන්ට උන්හිටිතැන් මතක් වන්නේ සමහරවිට  ගෙදර සිටින වෙන ප්‍රේක්ෂකයෙක් ගෙන් බැනුමක් අසා ගත්විටය. ටයිටැනික් චිත්‍රපටය බලා ඇඬූ , ඉකිබිඳි සුවහසක් ප්‍රේක්ෂක ජනතාව ඒකාලෙ මට බහුලව හමුවිය. අකේලේ හම් අකේලේ තුම් ගීතයට තමන් ගේ කුඩා දරුවා බදාගෙන හැඬූ අය ගැන මම අසා ඇත්තෙමි.  එක් අතකට සංවේදී ප්‍රේක්ෂකයන්ට  වරදක් කිවනොහැකිය. සංවේදී මිනිස්සු ඇත්තටම සුන්දරය.

නමුත් සංවේදී කම හරහට හිටින්නේ හොල්මන් කතාවක් බලන විටය. තිරයේ භූතයා මතුවීමට ආසන්න වනවිට හිමින් ඇස් පියා ගන්නා, එහෙත් නැතිනම් පොතක් වැනි දෙයක් සොයාගෙන එක වරම කියවන ප්‍රේක්ෂකයෝ දෙදෙනෙක් ඉස්සර අපේ ගෙදර සිටියහ.

ඉන් නොනැවතී තිරයේ චරිත වලට උපදෙස් දීමට ඉදිරිපත්වන තරමටම මේ සංවේදීකම දරුණු වේ. "අපරාදෙ ඔය ගෑණිට තියෙන්නෙ ඔයමිනිහගෙන් ඩිවෝස් වෙන්න. ඔහොම මිනිහෙක් එක්ක ඉන්න පුලුවනැයි !. අනේ ඔහොම ගොන් මිනිස්සු ඉන්නවද? මනුස්සයෙක් පස්සෙන් එනව ඔච්චරම දැනෙන්නෙ නෑද්ද? ඒ මිනිහට අහුවෙන්නම වගේ  ඒ ගෑනිත් මොකද ළඟින් දුවන්නෙ! දුවපං කො ගෑණියේ ඉක්කන්ට..බම්බු ගහනවද මංද!. යනාදී වශයෙන් චිත්‍රපට චරිතවලට උපදෙස් දෙති.

ලැජ්ජ බය ඇතිව හැදුනු ප්‍රේක්ෂකයෝ

මොවුන් අඳුනා ගැනීම ඉතා පහසුය. සිප වැළඳ ගැනීමේ දර්ශනයක් යනවිට මොවුහු බිම බලාගනිති. බැරි වෙලාවත් ඇඩම්ස් ඔන්ලි දර්ශනයක් යන්නේ නම් තත්වය දරුණුවෙයි. හොරෙන් අනෙකාගේ මුහුණ දෙස බලති. බලා ඇතැම්විට අනෙකාට තදවී "මොකද යකෝ මගෙ දිහා බලන්නෙ?" යනුවෙන් බැනුම් අසා ගනිති. ඇතැම්විට චැනල් එක එකපාරම මාරු වෙයි. තත්වය ඉවසාගත නොහැකිනම් නැගිට ඉවත්ව යති. ඇතැම්විට ඒ වෙලාවේම හදිසි දුරකථන ඇමතුමක් ලැබේ. නැත්නම් ඊ-මේල් එකක් බැලීමට තිබේ.

මෙයාදී වශයෙන් චිත්‍රපට ප්‍රේක්ෂකයෝ වර්ග ගණනාවක් වෙති. ඇතැම්විට එකම පුද්ගලයා තුල මේ සියලුම ආකාරයේ ලක්ෂණ පවතී.කෙසේ නමුත් පිරිසක් සමග චිත්‍රපට බැලීමේද අමුතුම ගැම්මක් තිබේ. එබැවින් මොනතරම් කරදරයක් වුවද පිරිසක් සමග චිත්‍රපටයක් බැලීමට ඉඩ ලැබේනම්  මම එය මග නොහරිමි.

සීවලී රූපය

වරදින්නේ නෑ වේලක් ගෙදරකට
සීවලී රූපයක් තියෙනකොට
අත්තම්මා කියනකොට එහෙම
සතුටු හිතුනා අපිට

වේලක් දෙවේලක් මගහැරෙන කොට
ඉබේ බැලෙනවා සීවලී රූපය දිහා
මුකුත් නොකියා එතකොට
මල්ලියි මායි ඉන්නවා බිම බලාගෙන

උඹලාගේ කුස ගින්න නිවන්න
අපේ උතුමට සහය දෙන්න
පාට පාටින් ඇඳගත්ත
මාමලාත් ආවා ඉල්ලගෙන

තාත්තාට කුලී ලැබුනම
සීවලී රූපෙත් එළියයි එදාට
සීවලී රූපයේ බලයෙන්
කුස පිරෙනවා හැමෝගෙම

තාත්තා ඔත්පල වූ දින සිට
වේලක් ලැබෙන්නෙත් ඉඳහිට
දූවිලි බැඳුනු සීවලී රූපය
පිරිසිඳු කරන්නේ පුරුද්දට

ධීර ගොවියෝ

මාතුපාල දුර තියාම දුටුවේ තම කුඹුරේ කවුදෝ මහත්තුරු නෝනලා වගයක් නිදහසේ ඇවිදිමින් ඉන්න අන්දමයි. අර පොඩි විජේ නේද ඒ කට්ටියත් එක්ක ඉන්නෙ ? මාතුපාල ඇඳින්නේ පොඩි විජේ විතරයි.

"මාතුපාලය්යේ මේ නෝනල මහත්තුරුන්ට කුඹුර බලන්න ඕනෙ කිව්ව". පොඩි විජේ ඈත තියාම කෑ ගැහුවා.

"ඒ අහවල් එකටද? "මාතුපාල ඇහුවේ නිකන් නොරොක් එකට වගේ.

"නෑ නෑ අපිට මේ ලස්සන කුඹුර බලන්න ඕනෙ උනා. ඉතින් මේ මල්ලි එක්ක ආවා අපිව ". කණ්ඩායමේ හිටිය එක නෝනකෙනෙක් කිව්ව.

"එතකොට මෙයාද මේ කුඹුරේ අයිතිකාරය? "  ඒ නෝන මාතුපාල ළඟටම ඇවිල්ල ඇහුවා. මාතුපාලගේ සැර එවෙලේ ටිකක් බාල වුනා.

"ඔව් මං තමයි" මාතුපාලත් ටිකක් කරුණාවෙන් උත්තර දුන්නා.

"ආ හොඳයි නේ..!" .නෝනා එහෙම කියල ලස්සනට හිනා උනා.

 එච්චර ලස්සනට මාතුපාලත් එක්ක සිරියලතා ඒ කියන්නෙ මාතුපාලගෙ පවුල වත් හිනා වෙලා නැතුව ඇති.

"මොකද්ද නෝනල ආ කාරණාව ?" මාතුපාල ඇහුවා.

 "අනේ මට නෝනා කියන්න එපා. මට මාධවී කියන්න ". නෝන බිම බලාගෙන එහෙම කිව්වම මාතුපාලටත් නිකන් මොකද්ද උනා වගේ.

"එතකොට මේඅය්යගෙ නම මොකද්ද?" මාධවී එහෙම ඇහුවා.

"මොකක්!... අය්ය! යකෝ මගෙ දූට වඩා අවුරුද්දක් දෙකක් වැඩිමල් ඇති". මාතුපාලට එහෙම හිතුනා.

"ආ මේ මේ. මං මාතුපාල" එහෙම කිව්වම මාතුපාලටම නිකන් ලැජ්ජයි වගේ.

"හොඳයි මාතුපාල අය්ය අපි ආව ධීර ගොවියෝ සංවිධානයෙන්. අය්ය අහල තියෙනවද අපි ගැන?" මාධවී ඇස් පුංචිකරල අහපු විදිහට මාතුපාල ආසාවෙන් මාධවී දිහාම බලාගෙන හිටිය මිසක් උත්තර දෙන්නත් අමතක වුනා.

"ආ..මේ මේ..නෑ නෑ.මං අහල නෑ". මාතුපාල බොහොම අමාරුවෙන් කියාගත්ත.

"හොඳයි අය්යෙ..අපි ධීර ගොවියෝ සංවිධානය..අපි ජාත්‍යන්තර සංවිධානයක්. අපි ආසියාවෙ කෘෂිකර්මාන්තය ඒ කියන්නෙ මේ කුඹුරු ගොවිතැනත් ඇතුලුව අනෙකුත් වගා කටයුතු නගා සිටුවීම සඳහා ක්‍රියාත්මක සංවිධානයක්. " මාධවී තරමක් බරසාර විඳිහට කියාගෙන යනවා. මාතුපාලත් ඔලුව වන වනා අහගෙන ඉන්නව. "අපි ගොවීන් දිරිමත් කරන්න නව වැඩපිළිවෙලවල් හඳුන්වා දෙනවා. අඩු පොළී ණය, එතකොට පිටරට සංචාරය කරන්න අවස්ථා.. ඒ වගේම අපේ විශේෂ ධීර ගොවි ආයෝජනය..අය්යට හිතාගන්නවත් බැරි ආදායමක් ඒකෙන් ගන්න පුලුවන් ඉතා පොඩි කාලෙකින්...ඇයි එතකොට ධීර ගොවි නිවාස වැඩ පිළිවෙල..අය්ය කැමතිද අපේ වැඩසටහනත් එක්ක එකතුවෙන්න ?"...මාධවී එහෙම අහන කොට මාතුපාලට එකපාරටම බෑ කියන්නත් බෑ වගේ හිතුනා.

"ආ දැන් කොහොමැයි අපි ඕකට එකතු වෙන්නෙ..මොනාද අපි කරන්න ඕනෙ..සල්ලිත් යනවද?" මාතුපාල ඇහුවෙ ඇත්තටම වැඩේ ගැන උනන්දුවෙන්.

"අය්යෝ සුලු දෙයයි. අය්ය මෙන්න මේ කොලේ පුරවල දෙන්න..ආරභක ගාස්තු මුදල රුපියල් දෙදාහයි. හැබැයි අය්යෙ පලවෙනි සති දෙකෙන් අය්යට දෙදාස් පන්සීයක් අනිවාර්යයෙන් ලැබෙනව. ඒ අපේ ධීර ගොවි ආයෝජන ක්‍රමය..මේ තියෙන්නෙ වාර්තා.. අය්යට තියෙන්නෙ තවත් අය මේ වැඩේට එකතු කර ගන්න." මාධවී එහෙම කියල ඉංග්‍රීසියෙන් ලියපු අකුරු ඉලක්කම් කොල වගයක් මාතුපාලට පෙන්නුවා. මාතුපාලත් ඉතින් ඔහේ බලාගෙන හිටියා.

"අපේ මේ ධීරගොවියො ඉතා කෙටි කලෙකින් තමුන්ගෙ ආරම්භක ආයෝජන මුදල වගේ කිහිප ගුණයක් හොයා ගන්නව. . අපි ඒ තරම්ම සාර්ථකයි. අය්ය තව අය මේ වැඩේට එකතු කර ගන්න ඕනෙ. පස්සෙ ආදායම වැඩි වෙනකොට තව ආයෝජනය කරන්න පුලුවන්.මේ බලන්න.. අවුරුද්දක් යනකොට අය්යගෙ ආදායම...කොහොමද? රුපියල් දෙදාහක් දාල පටන් ගෙන කොහොමද ඔයා හොයා ගන්න තරම අවුරුද්දකට".. මාධවී  කියවන ගමන් අතේ තිබුනි කැල්කියුලේටරයෙන් ඉතා වේගයෙන් ගණන් කීපයක් හැදුවා.

"බොලේ මෙච්චර ගාණක්...කවද කාපු ඉස්සො වඩේද මේ...? මාතුපාලට හිතා ගන්නවත් බෑ.  හිත ඇතුලෙ සතුට පුපුරු ගහනවා. "අම්මෝ මෙච්චර ගාණක්" මාතුපාලට එහෙම කියවුනා. "හ්ම් හ්ම්" මාධවී ඇස් හීන් කරල මාතුපාල දිහා බලාගෙන හිටියා.

"කලබල වෙන්න එපා අය්ය..දැන්ගෙදර ගිහින් මේ ෆෝම් එක පුරවගෙන රුපියල් දෙදාහත් අරං එන්න. අපේ වෑන් එක මෙතන තියෙනවා හැන්දෑවෙනකම්. හයට කලින් ආව නම් ඇති. කොටින්ම මාස කීපයකට පස්සෙ අය්ය ආයෙ කුඹුරු කොටන්න ඕනෙ නෑ. ඔව්ව මොන ජීවිතද අනේ? "

මාතුපාල විගහින් ෆෝම් කොලෙත් අරන් ගෙදර ආව.  හැබෑට මේ නෝන..මොකද්ද නම කිව්වෙ..මාධවී..අන්න රත්තරං මිනිස්සු. මෙච්චර කල් දුක් විඳල කුඹුරු කරන් මොනාද අපිට හම්බුනේ. රුපියල් දෙදාහක් දාල ගොඩ යන්න පුලුවන් මටත්. ඊළඟ මාසෙ වියදමට පරිස්සං කරගත්ත සල්ලි ටිකකුත් ඇති ගෙදර..දෙදාහකින් අවුරුද්දක්යන කොට හම්බෙන ගාණ ..බුදු අම්මෝ! අපේ ජීවිත ගැන එක ඇමති පරයෙක් බැලුවද මෙච්චර කල්? මෙන්න ඒකට දෙවිවරු ගමටම ඇවිත්.. දැන් ඉතින් මොන බයක් ද? රජෙක් වගේ ඉඳතැහැකි කෙල්ලගෙ කටයුතුත් කරගෙන.  මාතුපාල සිතුවිල්ලේම ගෙදර ආව.

ඉක්මනින් ෆෝම් කොලේ පුරවගන්න පුලුවන්. හොඳවෙලාවට කෙල්ල ගෙදර ඉන්නෙ අද . මාතුපාලෙගෙ දුවත් තාත්තගෙන් හරස් ප්‍රශ්න අහන්නෙ නැතිවම කොලේ පුරවා දුන්නා. ලාච්චු කීපයක් අවුස්සා මාතුපාල ගෙදර වියදමට තිබ්බ සල්ලි වලින් රුපියල් දෙදාහකුත් කොහොමහරි හොයා ගත්තා.

අනේ රත්තරං මාධවී නෝනා..! අනේ සිරියාවන්තකම. නෝන බැඳලද දන්නෑ !..ඉදකිං මං මොනාද යකෝ මේ හිතන්නෙ?.. මුකුත් දෙන්න වත් තිබ්බනං..මාතුපාලගේ හිත විස්සෝප උනා. මොනා දෙන්නද? ඔන්න ඔහේ පස්සෙ මුකුත් තෑග්ගක් දෙනවා. රත්තරං මිනිස්සු.

මාතුපාල ඉක්මනට ආපහු දුවගෙන ආව කුඹුර දිහාට..ඇයි දෙය්යනේ මේ මිනිස්සු මීට කලින් මුලිච්චි නොවුනෙ. මාතුපාලගේ හිත සිහින ගොඩක. ඇස්වහක් කටවහක් නෑ. කෙල්ලගෙ දීගෙ උනත් එක එකාට පාච්චල් නොවී කරතෑකි. නුවර නංගිලාට පේන්නම හොඳ මගුලක් කතැහැකි. ඕකුන් හෙන ඔලුවෙන් නෙ ඉන්නෙ උන්ගෙ මගුල ලොකුවට කරා කියල.. දෙන්නම් මේ සැරේ.. ඔන්න බලාගන්නිල්ලා මේ මාතුපාලගෙ රැස්පොට් ඊට පස්සෙ..මාතුපාලට කුඹර ළඟටම එනවා දැනුනෙ නෑ. 

කෝ මාධවී නෝනලෑ වෑන් එක...පේන්න නෑ.. ආං ග්‍රාමසේවක මහත්තයයි තව කට්ටියකුයි නං ඉන්නව.  ඒ ගොල්ලොත් ධීරගොවි සංවිධානයට බැඳෙන්නද? .

"ආ අන්න එනවා තවත් ධීර ගොවියෙක් ! "කට්ටිය අතරෙ හිටිය ගුණදාස මාතුපාලව දැකල හය්යෙන් කිව්වා.  "හැබෑද මාතුපාල උඹත් මේ තක්කඩියන්ට අහු උනා කියන්නෙ ?" ග්‍රාමසේවක මහත්තය එහෙම ඇහුවම මාතුපාල තක්කුමුක්කු උනා. "මොන තක්කඩිද ග්‍රාමසේවක මහත්තයො? කවුරුගැනද ඔය කියන්නෙ?" මාතුපාල පුදුමයෙන් එහෙම ඇහුවා. "ඇයි අර උඹත් බැඳෙන්න ගියෙ ධීර ගොවියෝ සංවිධානය..ආං ඒක"..ග්‍රාමසේවක මහත්තය එහෙම කියද්දි මාතුපාල උඩබිම බැලුවා.. 

"ඇ..ඇයි මහත්තයො මොකද්ද වෙලා තියෙන්නෙ?". මාතුපාල මුකුත්ම හිතාගන්න බැරි තැන ඇහුවා.."උන් හෙන හොරු කට්ටියක් බං. බොරු සංවිධානෙක නමක් දාගෙන මිනිස්සුන්ගෙ සල්ලි කඩා ගන්නව. බොරු ආයෝජන උප්පරවැට්ටි. අනේ උඹත් ගියානෙ උන්ට බැඳෙන්න. ආං පොලෝසියෙන් උන් සේරම කුදලගෙන ගියා. දැන් ඇති කූඩුවෙ. හොර යක්කු. උඹලත් ටිකක් මොළේ පාවිච්චි කරහල්ල බං ". ග්‍රාමසේවක මහත්තය තව මොනවද කියවගෙන ගියා.

ඔලුව ඇතුලෙ අකුණක් කෙටුව වගේ මාතුපාලට දැනුන. "හොරු !..බොරුකාරයො !...එතකොට මාධවී නෝන..! එයත් කලේ බොරුවද?  එයත් පොලීසියට අරන්ගිහින් ද?"   මාතුපාල අතේ තිබුනු සල්ලි ටික තදින් මිරික ගත්ත. හරියට කවුරුහරි උදුර ගන්නකොට වගේ.  එතකොට මාධවී නෝන කලේ බොරුවක්ද? මාතුපාලට ඒ හිනා වෙනකොට හීන් වෙන ඇස්...ආයෙ ආයෙමත් මැවිල පේන්න ගත්ත.

කුඹුරු යායට උඩින් කොක්කු රෑනක් ඉගිල්ලෙන්වා මාතුපාලට පෙනුනා. උන් හුඟාක් ඈතට පියෑඹුවා. ආයෙ කවදාවත්ම මාතුපාලගෙ කුඹුරට නො එන්නම වගේ හුඟාක් ඈතට යන හැටි මාතුපාල බලාගෙන හිටියා..