පාළු හිස් බිම්වල
උසට නැගී මහගස්
එකිනෙකට ඈතින්
සවිමත්ව නැගි මහ ගස්
විඳ දරාගෙන ග්‍රීෂ්මය
ශීත වැහි කුණාටු ද
අභීතව සිට ගත් මහ ගස්
ඉඳ හිට අතුවනා
දුරක ඇති ගස් වෙත
මඳ සිනා නගාගෙන
පෙනෙන නොපෙනෙන ලෙසට
යහතින් සිටින බව තමන්
ඉගිකරයි
හුදෙකලාවේ නැගි මහ ගස්
අතු රිකිලි පිරි පිරිමැද
හමාගිය සුළඟකට
උන් කීය රහසක්,
සබඳ අපි
ඉඳ හිට දකින සිහිනයක් වෙයි
නෙක තුරු ලතාවන්
එකිනෙකට ඈඳුණු,
උනුන් හා බොහෝ කෙළි කවටකම් කරන
එක්ව වැඩෙන
එක්ව මියයන
එක්ව වැළපෙන
මහා වනයක
අපිද වැඩී සිටින්නෙමු.
බොහෝ කල් පිපී හිනැහුන
අකලට පිපී මියැදුන
නොඉපදීම වියැකුණ
මේ ගසේ විය
බොහෝ මල්
මහ ග්‍රීෂ්මෙක,
නොකලට පිපී
හුදෙකලාවම හිනැහෙන
එක් මලක්
මහ ඉඩක
පාලු මකනා
තනිව හිනැහෙන
එක් මලක්
තනිව ඉන්නා නිසා
සුවඳවත් නොබලාම
බොහෝ අය පෙම් බඳින
එක් මලක්
එයත් වියැකුණු දාට
මහ පාළුවක් ගෙනෙන
අවාරේ පිපිණු
තනි මලක්
අනුෂ්ක තිලකරත්න
15/01/2025
වසර දහ අටක්
නොවියැකුණු මතකයක්
මතක පිටුවක අතරමැද
තිරලෙසම රැඳි මහ ගසක්
එදවසට පසුවත්
රතු මලින් වැහෙන්නැති
ඉන් පෙරත් එලෙසම
රතු මලින් පිරෙන්නැති
ඒ එකම එක් වරක් අපේම වූ බව
ඒ මහාගස නොදන්නවා ඇති
අනුෂ්ක තිලකරත්න
28/11/2024
