හිම කුමරිය මිය ගිහිල්ල

හිම කුමරිය මිය ගිහිල්ල
මිය ගිහිල්ල?
හැබෑවටම මිය ගිහිල්ල
ඉරිද පොළේ මුල්ලෙ කොටුවෙ
ඇපල් ගොඩයි දොඩම් ගොඩයි
අතර මැද්දෙ වැටිල හිටිය

යුද්දෙට ගිය කුමාරයා
ගෙදර ආවෙ පෙට්ටියකින්
මාළිගාවෙ දොර වහලා
දරු දෙන්නත් කර පින්නන්
හිමකුමාරි ගමට ආව

ඉරිද පොළේ මුල්ල කොටුව
අඩු ගාණට අරන් දුන්න
සූකරයත් ණය ඉල්ලන්
රෑට රෑට ගෙට රිංගුව

පොලෝසියෙන් කියන පරිදි
දිවි නහගත් තව එකියක්
“ඇගේ අතින් වස දාගෙන
ඇයම කාල ඇපල් ගෙඩිය”

දරු දෙන්නත් කර පින්නන්
ගමට ආව හිම කුමරිය
අන්තිමේදි මිය ගිහිල්ල
දිවි නහගෙන මිය ගිහිල්ල

සිතුවම - Liese Chavez

ශිශිරයක අව්ව

ඇඟ මැලි කඩා

විදහා අතු පතර

විඳගනී තුරු පෙළ

ශිශිරයක අව්ව

උණුසුම් කබා හිස් වැසුම් පැලඳ

මහමගට වන් දනෝ

අඩවන් නෙතින් සිපගනිති

ශිශිරයක අව්ව

හිම ගොඩින් මතුව ආ

පුංචි මල් පොහොට්ටුවක්

අසීමිතව පෙම් කරන

ශිශිරයක අව්ව

ගිම්හාන සමයේ

රුදු හිරුකිරණ

සඟවාවි නුඹව

ශිශිරයක අව්ව

බාප්පට සීනි හැදිලා

දන්න කාලේ ඉඳලා

කෑමට බීමට රුසියා

සේරම චණ්ඩි කං නැවතිලා

බාප්පට දැන් සීනි හැදිලා

කාලෙකට පස්සේ ගෙදර ආදා

විස්කෝතුවක් විතරයි කෑවේ

කේක් කෑල්ලට අත තිබ්බාම

එරෙව්වා පුංචි අම්මා

උදේට දුවනවා

හවසට පයින් එනවා

සීනි නැති තේ කෝපි

දඬුවමද විඳිනවා

පාටියක් දවසේ කාලා පැණිරස වගයක්

අතිජාත මිතුරෙක් ගින්න දීලා ගෙදරට

පහුවදා ඉඳලා නෝපාටි  පණවලා

කූපන් ක්‍රමයටලු දැන් කෑම ලැබෙන්නේ

බලපන් පුතේ මෙහෙමත් කරුමයක්

පොඩි එකා කනවා අයිස්ක්‍රීම් පෙන්න පෙන්නා

දැන් ඉඳලාම උඹලත් හිතට ගනිල්ලා මේ ටික

කනවා බොනවා වාගේම එක්සයිස් කරපියව්

උදේ දුවනවා

හවසට පයින් එනවා

කරවිලයි කොතලහිඹුටුයි හොයනවා

බාප්පට සීනි හැදිලා

හිතේ තියෙන ගඟ

හිතේ තියෙන ගඟ
සොයන්නෙමි බොහෝ කල්

තුරු වදුලක සැඟව සිට
තාලයට ගලාවිත්
සිත අද්දරින් බැස යයි
ඒ හිතේ තියෙන ගඟ

නෙත නොදුටු සාංකාවෙන්
සොයමි මම හිතේ තියෙන ගඟ

නෙත අද්දරින් ගලා යයි ගඟක්
ඒ හිතේ ඇඳි ගඟ නොවේ
කොහිද ඒ හිතේ තියෙන ගඟ

මහ වැසි ඇද වැටුනු දා හැන්දෑවක
හිරුගේ අවසන් සිතුවම තවරගෙන
ගලා යයි නෙත අද්දරින් ගඟ
තාලයට සීරුවට

ඉතින් නුඹමවෙයි අද පටන්
හිතේ තියෙන ගඟ

පුංචි ගිණිකූරු වෙළෙන්දිය

පුංචි ගිණිකූරු වෙළෙන්දිය

තවමත් මගේ හිත අද්දර

හිම මිදෙන සීතලේ

අන්තිම ගිණි කූරත් දල්වා

උණුසුම් වෙන්න හැදුව

රස බොජුන් කුස් පුරවන

උණුසුම් අවන්හල් ඉදිරිපිට

ඈ සිටින්නී

හිස්වූ කුසින්

මැලවුනු වතින්

පුංචි ගිණි කූරු වෙළෙන්දිය

හිම මිදෙන සීතලේ

මැදියම් රැය තෙක්ම

ගිණිකූරු විකුණන්න හැදුව

කාමරය උණුසුම්ය

රස බොජුන් මේස මත

බැබළෙන විදුලි එළි සමග

සියල්ල සූදානම්ය

ජනේලයට එපිටින් ඈ සිටින්නී

සීතලේ ගැහෙමින්

හිස්වූ කුසින්

ඒ දෑස මහ හැර

සාදය අරඹන්න

අබිලිං මාමේ

ඉක්මනින් ගෙනැවිත් දීපං
ගම්මුන්ගෙන් ගත්ත ණය තුරුස්
අතින් වියදං කරං

පිං කං කලත්

ඒ පිං මදිලු

උඹේ ණය හිලව්වට

පිරිත් කොටු ගැහුවාට

පිං කං කලාට

බණ පදයක් ඇහුවාද

මතක ඇති කාලයක

නොදැන හිටියේ ඒකයි උඹ

බීමත් කමේ ආදීනව

උඹ ඉන්න හින්දද කොහෙද

පිචර් එක දිව්වෙත් නෑ හරියට

ගැලපෙන්නෑ ඕවා මෙහාට

සේකරත් ඇඬුවාලු අන්තිමට

අහසට වඩා ලොකු උඹේ හිත

ඊටත් වඩා ලොකු ණය කන්ද

උඹ නැති පාලුව දරාගෙනම

අතීතයෙන් ගඟ ගලා බසී තවම

අන්තිම නවාතැන

කෙනෙක් ඉඳ ගිය පසු

අන්න තව කෙනෙක් ඇවිදින්

කෙමෙන් පියවෙන නෙත් දෙස

බලා හිඳීවි සිවිලිම

අවසන් සුසුම් පොද උරා ගෙන

තව තවත් දැඩි වේවි බිත්තිය

හැකි ලෙස ඔබව රැකගනිමි

පිටත ඇති සීතලෙන්

ඉතින් පවසන්න මට ඔබේ කතාවත්

නිසසලව අසා සිටින්නෙමි

අවසානයේ කවුළුව හැර තබමි

පිටව යන්නට ඔබට

අවහිරයක් නොමැතිව