සිත්තර පෙම්වතිය

සුදු පාට කැන්වස් තලය මත
කටු සටහනින් ඇඳි
මගේ කලු සුදු රූපය
නුඹ බියපත් කරයි
නුඹ බොහෝ බිය වෙයි

පින්සලෙන් පින්සල ගෙන
නේක වර්ණ තවරා
යුහුසුලුව මතු කරන්නී
වර්ණවත් රූපයක්
දහඩිය ද හෙළමින්
තුටු වන්නී

ඉතින් මෙන්න නුඹ
බලන් කෙතරම් හැඩද දැන්
සැනසුම් සුසුමක් හෙලන්නී
කෙතරම් බියකරුද අර
කලු සුදු රූපය

රොබින් හුඩ් අය්යලා

රොබින් හුඩ් අය්යලා

දැන් සටන අතහැරලා

ගල්ගුහාවකට වෙලා

බුම්මගෙන ඉන්නවලු

ආරංචියේ හැටියට

ජනතාව දැන් හරි වෙනස්ලු

ඉස්සරවගේ ඒ ගොල්ලොන්ට

සපොර්ට් එක දැන් නෑලු

නොටින්හැම් බලකොටුවෙ

හැමදාම නත්තල්ලු

රෑට රෑට හැමදාම

මල් වෙඩි පෙන්නනවාලු

ගිස්බන් ගෙනුත් දැන් කරදරයක් නෑලු
සිරියාව බේරෙන්න හිනාවෙන්නත් දන්නවලු

බබාලත් වඩා ගන්නව්ලු ඉඳ හිට

හැබැයි තාමත් එහේ එල්ලලා මරණවාලු

ඒ උනාට ජනතාව

ප්‍රීතියෙන් ඉන්නවලු

මහ රජාත් ළඟදි

එහේ ඇවිත් ගිහින් ලු

රොබින් හුඩ් අය්යලා

දැන් සටන ඇතහැරලා

කණ්ඩායමට බැඳෙන්න ගිය මං

ෂර්වුඩ් කැලේ තනි වෙලා

හතුරෙකු ගේ මළ ගම

අදින් පසු මට

කෙනෙක් නැති වේවි

මතක් වෙන විටත්

තරහ යන

තරහ හිත තබාගෙනම

ආවෙමි ඔබේ මළගෙදර

ඔබත් මාත් හැර කිසිවෙකුත්

නොදන්නා ගානයි

ඔබ හා මම අමනාප බව

ඉතින් ඔබ මිය ගොස්ය

පරණ තරහ ඉතිරි කර

ඔබ යන්නට ගොහින්

මග තොටේ විටෙක

හැදුවා නොවෙද ඔබ

කතා කරන්නට මා සමග

කතා නොකළෙමි ඔබට

මම තරහා බැවිනි

ඉතින් දැන් කා සමග

තරහෙන් ඉන්නද මම

හිස් බවෙන් මිරිකෙමි

වේදනාවෙන් තැවෙමි

පරණ තරහ ඉතිරි කර

ඔබ මියගොසිනි.

ඒ බල්ලා

ඒ වල් බල්ලා

හැරිලාවත් බැලුවෙ නෑ

මං දැම්ම ඉස්පංචි කෑල්ල දිහා

කෑල්ලක් නොදී මං

දෙන්නද ඔක්කෝම

මංවත් නොකා

නැත්තං අනික් කඩෙන්

ප්‍රයිඩ් රයිස්  අරං

පිං පිණිස දෙන්නද ඌට

උපන්නා නම් වල් බලු ගොඩේ

ඉන්නට ඕනෑ ඒවිදිහට

දෙන දෙයක් කාලා

අගුපිලේ බුදියලා

තනියම හොරි කසාගෙන

ලොරියට බස් එකට අඩ තියා

වැලිගම්පිටි යන්ඩෝන

අන්න එහෙමයි

උඹලා ඉන්ඩෝන

හිතන්නැති අර

තඩි විසාල ගේට්ටුවෙන්

හොම්බ දාගෙන බුරන

සුපිරි බල්ලා වගේ කියලා

මතක තියාගන් මේටික

බල්ලෙක් වුනත් ඌ පෙට් කෙනෙක්

හැබැයි උඹ බල්ලෙක් සදහටම

නිකන් නෙමෙයි

වල් බල්ලෙක්

ගස් කැච් ඔට්ටුයි

හැන්දෑවෙ හතරට

එකා දෙන්නා ඇදෙනවා  පාරට

කඩේ බංකුව විකට් එක

බැට්ස්මන් ට වඩා උසයි විකට් එක

අර්ජුනලා අරවින්දලා හෂාන්ලා

යුනුස් ලා අක්‍රම්ලා

ලාරලා ඩොනල්ඩ් ලා

මේ ඔක්කොම හිටියා අපි එක්ක

ගස් කැච් ඔට්ටුයි

බලු වත්තට ගියොත් අවුට්

හුඹහට උඩින් හතරයි

හයක් ගැහුවොත් වීරයෙක්

ලොකු අය්යලා ගේ බෝල් 

සැරවැඩියි හැමදාම

වැඩිය එන්නැති පොඩි මල්ලිලා

හැමදාම ලාස්ට් මෑන්

දැන් නම් පාරටත් තාර වැටිලා

වටේටම තාප්ප බැඳිලා

ගස් කැච් ඔට්ටු කල පොල් ගස්

ඉඳ හිට බලනවා අපි දිහා